ମେଗାନ୍ ହଲ୍‌ଙ୍କ କବିତା 'ଭଲ ପାଇବା ଏକ ଅଭ୍ୟାସ'

ଅନୁବାଦକ - ଶୈଲେନ ରାଉତରାୟ

କେପ୍ ଟାଉନ୍ ଉତ୍ସବରେ ବ୍ୟବହୃତ ଏକ ମୁଖା
ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍

ଭଲ ପାଇବା ଏକ ଅଭ୍ୟାସ;
ଦାନ୍ତ ଘଷା କିମ୍ବା ଗାଧୁଆଘର ସଫା କଲା ପରି ।
ଏବଂ ପ୍ରେମ ଯଦି ଏକ ଅଭ୍ୟାସ ହୁଏ,
ତାହା ହେଲେ ଶୋକ ବି
କଅଣ ଆଉ ଗୋଟେ ଅଭ୍ୟାସ ମାତର ?
 
ତୁମ ପାଇଁ ମୋର ପ୍ରେମ ଆଉ ଶୋକର ଅଭ୍ୟାସକୁ
କେଉଁ କା’ ମେଣ୍ଟାଇବ କୁହ ?
ଯେଉଁ ଅଭ୍ୟାସ ଜମିଅଛି
ଧିରେ ଧିରେ
ସଘନ ସରଳ ଆଉ ପାଉଁଶିଆ,
ଦାମିକା ଓ ଅଳଙ୍କରଣରେ ଉଦୁଉଦିଆ
ଏକ ମୁକ୍ତାର ଉପମାର ସହ ।
 
ଅଥବା ସେ ଅଭ୍ୟାସ 

ମାହୋଗାନୀ କାଠର ଖାଇବା ଟେବୁଲୁର 

ଚକମକ ପାଲିସିର ରଙ୍ଗ ପରି;
ପାଚିଛି ଯେ, ଘଣ୍ଟା ଘଣ୍ଟା ଘଷା ମଜା ସହି ସହି ।
ପିଲାଟେ ଉକୁଟି ଆସିଲା ସମ ଗର୍ଭରେ
କୋଷ ପରେ କୋଷ ରହି ରହି ।
 
ମାତ୍ର ଗର୍ଭ ବଢ଼େ ବିଭାଜନେ,
ଯୋଗ ଦ୍ୱାରା ନୁହେଁ ।
ଏକଇ କୋଷ ହିଁ ଫାଟେ ନିୟୁତ ଅଂଶରେ;
ଆଉ ହଠାତ୍ ଦେଖିଲା ବେଳକୁ
ହାତରେ ବାଜେ ପିଲାର ଗୋଇଠା
ଆଉ, କାନକୁ ଶୁଭେ ଦୁକୁଦୁକି ଛଅ ମାସ ପରେ ।
ଭଲ ପାଇବା ଏକ ଅଭ୍ୟାସ
ଠିକ ତୁମେ ଦେଇଥିବା ପ୍ରିୟତମ ଶୋକ ପରି ।
 
କିନ୍ତୁ ମୁଁ ଚାହେଁ ତୁମେ ହୁଅ
ମୋର ଇପ୍ସିତ ସପ୍ତରଙ୍ଗୀ ମୀନ;
ଆଉ ତୁମ ପାଇଁ ମୋର ଶୋକ ହେଉ 

ଏକ ମସ୍ତବଡ଼ ଜାଲ ଛିଦ୍ରହୀନ।
 
ତୁମ ବିନା ପ୍ରଥମ ରବିବାର ଭୋଦୁଅ ସକାଳ
ଲାଗେ ଥଣ୍ଡା ଆଉ ଖାଲି;
ପ୍ରେମର ଅଭ୍ୟାସ ପାଇଁ ଯନ୍ତ୍ର ନଥିବାରୁ
ଫୁଟିବେ ଫୁଟିବେ ବୋଲି ରହିଯାନ୍ତି,
ଲକ୍ଷାଧିକ ମଲ୍ଲୀ ।

କବି ପରିଚିତି: ମେଗାନ୍ ହଲ୍ (ଜନ୍ମ – ୧୯୭୨) ଙ୍କର ଜନ୍ମ ଓ ଶିକ୍ଷା ଉଭୟ ଦକ୍ଷିଣ ଆଫ୍ରିକାର କେପ୍ ଟାଉନ୍ ନଗରରେ । ୧୯୯୫ ମସିହାରୁ ସେ ପ୍ରକାଶନ ଶିଳ୍ପରେ କାମ କରିଆସିଛନ୍ତି । ସେ ୨୦୧୮ ମସିହା ପର୍ଯ୍ୟନ୍ତ ଅକ୍ସଫୋର୍ଡ଼୍ ୟୁନିଭର୍ସିଟି ପ୍ରେସ୍‌ର ଦକ୍ଷିଣ ଆଫ୍ରିକା ଶାଖାରେ କାର୍ଯ୍ୟରତ ଥିଲେ । ତାଙ୍କର ପ୍ରଥମ କବିତା ସଙ୍କଳନ ‘ଫୋର୍ଥ୍ ଚାଇଲ୍ଡ୍’ - ‘ଚତୁର୍ଥ ସନ୍ତାନ’ - ନିମନ୍ତେ ସେ ୨୦୦୮ ମସିହାର ସମ୍ମାନଜନକ ଇନଗ୍ରିଡ଼୍ ଜଙ୍କର୍ ପୁରସ୍କାର ଲାଭ କରିଛନ୍ତି ।