ପାଲି 'ଧର୍ମପଦ'ର ଓଡ଼ିଆ ପଦ୍ୟାନୁବାଦ

ଯମକ ବର୍ଗ ୧୯-୨୦

ଅନୁବାଦକ - ଶୈଲେନ ରାଉତରାୟ

ପଦ୍ୟାନୁବାଦ

ଯଦିଚ ମଣିଷ ଧର୍ମଗ୍ରନ୍ଥ କରି ପାଠ ।

ପ୍ରମାଦ ନ ତେଜି ପୁଣ ହୋଇ କରି ମଠ ।।

ଗୋପାଳ ଯେପରି ପର ଗାଭୀ ଗଣୁଥାଇ ।

ଶ୍ରାମଣ୍ୟ ଫଳର ଭାଗୀ ହୋଇ ନ ପାରଇ ।୧୯।

ଯେଉଁ ଜନ ଧର୍ମଗ୍ରନ୍ଥ ଅଳ୍ପ କରି ପାଠ ।

ଧର୍ମ ଅନୁସାରେ ଧର୍ମ କରୁଥାଇ ଶାଠ ।।

ରାଗ, ଦ୍ୱେଷ, ମୋହ ଆଦି ତ୍ୟାଗ କରିଦେଇ ।

ସମ୍ୟକ ପ୍ରଜ୍ଞାନଯୁକ୍ତ ନିଶ୍ଚିତେ ହୁଅଇ ।।

ଚିତ୍ତ ସୁବିମୁକ୍ତ, ଶ୍ରାମଣ୍ୟ ଫଳେ ତା ଭାଗ  

ଇହ ପର ଲୋକେ ନାହିଁ ଉପାଦାନେ ଯୋଗ ।୨୦।

ମୂଳ ପାଲି ପଦ

ବହୁଂପି ଚେ ସହିତଂ ଭାସମାନୋ ନ ତକ୍କରୋ ହୋତି ନରୋ ପମତ୍ତେ ।

ଗୋପୋ'ବ ଗାବୋ ଗଣୟଂ ପରେସଂ ନ ଭାଗବା ସାମଞ୍ଜସ୍ସ ହୋତି ।୧୯।

ଅପ୍ପମ୍ପି ଚେ ସହିତଂ ଭାଷମାନୋ ଧମ୍ମସ୍ସ  ହୋତି ଅନୁଧମ୍ମଚାରୀ ।

ରାଗଞ୍ଚ ଦ୍ୱେଷଞ୍ଚ ପହାୟ ମୋହଂ ସମ୍ମପ୍ପଜାନୋ ସୁବିମୁକ୍ତଚିତ୍ତୋ ।

ଅନୁପାଦିୟାନୋ ଇଧ ବା ହୁରଂ ବା ସ ଭାଗବା ସାମଞ୍ଯସ ହୋତି । ୨୦। 

ଅନୁବାଦକୀୟ ଟୀକା: ଏହି ଅଧମ ଅନୁବାଦକକୁ ପାଲି ଜଣା ନାହିଁ । ଏଣୁ ଏହି ପଦ୍ୟାନୁବାଦଟି ପାଇଁ ତାହାର ମୂଳ ସହାୟ ହେଲା  ପ୍ରଫେସର ପ୍ରହ୍ଲାଦ ପ୍ରଧାନଙ୍କ ଦ୍ୱାରା ସମ୍ପାଦିତ 'ପାଲି ଧର୍ମପଦ' ଗ୍ରନ୍ଥଟି, ଯେଉଁଥିରେ ସେ ସଂସ୍କୃତ ରୂପାନ୍ତର ସହ ଓଡ଼ିଆ ଗଦ୍ୟାନୁବାଦ କରିଯାଇଛନ୍ତି । ଗ୍ରନ୍ଥଟିର ପ୍ରଥମ ସଂସ୍କରଣ ୧୯୭୮ ମସିହାରେ ପ୍ରକାଶିତ । କିନ୍ତୁ ଏହି ଅନୁବାଦକ ୧୯୯୪ ମସିହାରେ କଟକସ୍ଥ ପ୍ରକାଶନ ସଂସ୍ଥା ଫ୍ରେଣ୍ଡ୍‌ସ୍‌ ପବ୍ଲିଶର୍ସ ଛାପିଥିବା ଦ୍ୱିତୀୟ ସଂସ୍କରଣଟି ବ୍ୟବହାର କରିଛି । ଏହା ଛଡ଼ା ଏହି ପଦ୍ୟାନୁବାଦ କରିବା ପାଇଁ 'ଦି ସେକ୍ରେଡ଼୍ ବୁକ୍ସ୍ ଅଫ୍ ଦି ଇଷ୍ଟ୍' ସିରିଜ୍‌ରେ ମାକ୍ସ୍ ମ୍ୟୁଲର୍‌ଙ୍କ ଦ୍ୱାରା ସମ୍ପାଦିତ 'ଦି ଧମ୍ମପଦ' ଇଂରାଜି ଗ୍ରନ୍ଥଟିର ୨୦୧୩ ମସିହାରେ ରୁଟ୍‌ଲେଜ୍ ଛାପିଥିବା ସଂସ୍କରଣଟିର ମଧ୍ୟ ବ୍ୟବହାର କରାଯାଇଛି ।