ସିଲି ପାଇଁ

ଶୈଲେନ ରାଉତରାୟ

କାଠମାଣ୍ଡୁର ଏକ କୋଠାରେ କାଠକାମ
ଫଟୋ  କ୍ରେଡ଼ିଟ୍ - ୱିକିମିଡିଆ କମନ୍ସ୍

ତୁ ସେକେଣ୍ଡ କ୍ଲାସ ରଖିଲୁ,

ଭଲ କଲୁ ।

ତୁ ସାଲେପୁରରେ ରହ କି କଟକରେ,

ଗଣିତ ପଢ଼ କି ଅର୍ଥନୀତି,

ଯେମିତି ଅଛୁ

ସେମିତି ଥା';

ମୋଟି, ଗେଡ଼ି,

ନବାବପୁଅକୁ ଜବାବ ଦେଲା ବାଲି ।

ନିଜ ଆଖିକୁ କେବେ ଛୋଟ କରିବୁନି ସିଲି;

ଜୀବନର ଆଖିରେ 

ଆଖି ପୁରେଇ ଦେଖିବୁ ।

ଆଗେ ପତା ପକେଇବୁନି,

ତା'କୁ ଆଗେ ଆଖି ବନ୍ଦ କରିବାକୁ ବାଧ୍ୟ କରିବୁ ।

ଦୋଳିରେ ଝୁଲିବୁ ଭଉଣୀ,

ଆକାଶ ଛୁଇଁବୁ ।

ହେଲେ ନଜର ରଖିବୁ ମାଟି ଉପରେ;

ଆଉ ତା' ପିଠିରେ ଥିବା ନୀଳ ବିଷାଦର 

ମାନଚିତ୍ରରେ ।

ମୁଁ ଚିଡ଼ଉଚି ବୋଲି

କେବେ ଓଜନ ଝଡ଼େଇବୁନି ସିଲି;

ତୁ ସବୁବେଳେ ସେମିତି

ପ୍ରଶ୍ନଚିହ୍ନ ପରି ଓଜନିଆ ହେଇ ରହ ।

ରହ ବେପରୁଆ,

ଅଦିନିଆ କରକା ପରି ।

ରହ ତୋ' ନିଜ ପରି,

ସିଲି ପରି ।

କ୍ରୋଏସିଆ ଦେଶରେ ସ୍ଥିତ ପୁଲା କ୍ୟାଥିଡ୍ରାଲ୍
ଫଟୋ କ୍ରେଡିଟ୍ - ୱିକିମିଡିଆ କମନ୍ସ୍

ବି.ଦ୍ର. - କବିତାଟି ପାଖାପାଖି କୋଡ଼ିଏ ବର୍ଷ ପୂର୍ବେ ଲେଖା ହୋଇଥିଲା । କବିତାର ସର୍ବସତ୍ୱ ଲେଖକଙ୍କ ପାଖରେ ସଂରକ୍ଷିତ ।