ତୋ ପାଦ ଛାଡ଼ିବି ନାହିଁ

ଶୈଲେନ ରାଉତରାୟ

ହଂସ, ଫିନଲାଣ୍ଡର ହେଲସିଙ୍କି ନିକଟରେ
ଫଟୋ କ୍ରେଡ଼ିଟ୍ - ୱିକିମିଡିଆ କମନ୍ସ୍

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।

ଲକ୍ଷେ ଜନମରେ ଧନ୍ଦି ହୋଇ ପାଇ

ଆଉ ତ ହୁଡ଼ିବି ନାହିଁ ।

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।୦।

ଶତେକ ସହସ୍ର ଯୋନିରେ ଜନ୍ମିଲି

କର୍ମ ବିପାକରେ ମୁହିଁ ।

ମାନବ ଜନମ ଲଭିକରି ଆଉ

କରମ ଅର୍ଜିବି କାହିଁ ।

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ । ୧।

ତୋ' ପଦଯୁଗଳ ଶତଦଳ ମଧ୍ୟେ

ଭ୍ରମର ମୁହିଁ ଅଟଇ ।

ଅସାର ସଂସାର ଫ‌ୁଲ ତ୍ୟଜ୍ୟା କରି

ତା' ରସ ମୁହିଁ ପିବଇ । 

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।୨।

ତୋ' ପଦାରବିନ୍ଦର ଯେ ମକରନ୍ଦ

ବଡ଼ ମନ୍ଦ ଅଟେ ସେହି ।

ନ ଜାଣି ତୋ' ଛନ୍ଦ ଲାଗିଗଲା ବନ୍ଧ

ନାଚେ ପିଇ ଥେଇ ଥେଇ ।

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।୩। 

ତୋ'ର ପଦଦେଶ ଅଶେଷ ଯେ ବିଶ୍ୱ

ତହିଁର ମୂଳ ଅଟଇ

ଛାଡ଼ିବାକୁ ମନ ହେଲେ ବି ମୁଁ ଧନ

ଛାଡ଼ିକି ସତେ ପାରଇ ।

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।୪।

ପାଦ ପାଣି ମୁଖ ନାହିଁ ଯେ ଅରୂପ

ତାହାଙ୍କର ରୂପ ତୁହି ।

ସେହି, ତୁହି, ମୁହିଁ ଏକ ହେଲେ ସିଲୁ

ରାଉତ ପାଦ ଛାଡ଼ଇ ।

ଯୋଗାନନ୍ଦ ତୋ' ପାଦ ଛାଡ଼ିବି ନାହିଁ ।୫।